Залуу нас Р.Чойном

2011-12-12,10:03 AM
Хөрстийн амьдралд хөл алдсан
Хөлчүүхэн зүрхний минь тольтон дээгүүр
Шувууны сүүдэр шиг дайраад өнгөрсөн
Шунхан улаан залуу нас минь
     Амттан бүхний амтыг мэдэлгүй
     Асгаж явсан залуу нас минь
     Өнгөтөн бүхний өнгийг бодолгүй
     Үрж явсан залуу нас минь
Зуны шөнийн нойрыг тоолгүй 
Зуун гурван учралыг мөрөөсөж
Зураг шиг охидыг тэрэг шиг дайрч
Зуурдхан мандсан залуу нас минь    
      Өвлийн есийн жаврыг тоолгүй
      Өөр хүний авгайд сэтгэл хаяж
      Өрхний үзүүр шиг дэрвэж явсан
      Өлчирхөн тэнэг залуу нас минь
Даанч чи минь удсангүй
Даавуу хүрэм савхин бээлий хоёр шигээ
Дассан салсан годон гэзэгтүүд шигээ
Дардан зам дээр үлджээ-Залуу нас минь
      Улаанбаатарын чулуун засмалаар
      Урагшаа хойшоо баруун тийшээ зүүн тийшээ
      Дотоод үйлдвэрийн хүнд шаахайг
      Долоохон хоногт точийлдож  явахдаа 
Хүний сайн мууг зүүдлээч үгүй
Хүүхэд шиг өссөн залуу нас минь
Хүүхний сайхныг таниа нь үгүй
Хүүрзгэнэ шиг ниссэн залуу нас минь
      Ангарайтсан нөхөдтэй үдшийн цагаар
      Адуу шиг пижигнэсэн залуу нас минь
      Айлын чийдэн хага чулуудаад
      Авирлаж явсан залуу нас минь
Аавын хүүгийн шүр шиг хацрыг
Алгадаж явсан залуу нас минь
Адилхан нөхдийнхөө хамрын цусыг
Асгаж явсан залуу нас минь
      Үзсэнээ мартаж дуулсанаа тогтоохгүй
      Үүрдийн юм шиг дургиж явахдаа
      Үймээнт хорвоогоос дахиад олдошгүй
      Үнэнч ханийнхаа дэргэдүүр өнгөрч
Хоног төдий зуурдхан ханилах
Хотын хүүхний өнгөнд хууртаж
Ариухан цусаа түүний төлөө
Асгаж явсан залуу нас минь
      Оюутан ахуйн дэврүүн шүлгийн
      Онгод цадигаар бялхаж явахдаа
      Орчлон хорвоогийн нарийн учрыг
      Олчихлоо хэмээн төөрч явсан
Ариунаас ариухан залуу нас минь
Арваадхан жилийн ханилгаатай байжээ
Халуунаас халуун залуухан цаг минь
Хаврын үер шиг хугацаатай юм санжээ
     Аяа хөөрхий хүмүүний залуу нас гэж 
     Авч ч болдоггүй өгч ч болдоггүй
     Хэлгүй байгалын дуугүй зарлигаар
     Хэсэгхэн олддог шагнал юм уу даа
Бусдын лангуунд энэхүү шагналаа
Бутархай мөнгө шиг тарааж хаясаар
Хүйтэн хорвоод нэг мэдэхнээ
Хүмүүний үр нүцгэрдэг байна
    Сайн ханиас хагацсан хойноо
    Санан санан гунихардаг шиг
    Болоод өнгөрсөн хойно залуу насаа
    Бодон бодон харуусдаг байна
Баяртай залуу зандан нас минь
Барилдсан гэж бодвол би ойчжээ
Уралдсан гэж үзвэл би хоцорчээ
Арилжаа наймаа хийсэн юм санж гэвэл харин
Атархан биеийнхээ эрүүл мэндийг өгч
Алдар шүлэг хоёрыг чинь авчээ !
    Хөрстийн амьдралд хөл алдсан
    Хөлчүүхэн зүрхний минь тольтон дээгүүр
    Шувууны сүүдэр шиг дайраад өнгөрсөн
    Шунхан улаан залуу нас минь! Баяртай!
бичсэн: dorjoo_1122 төрөл: шүлэг | (1) Сэтгэгдэл | найздаа илгээх | Уншсан: 363 удаа

Сэтгэгдэл бичих
Сэтгэгдэл:

ярзайтал инээх
dorjoo_1122 хэзээ бичсэн: 11:07 AM, 2011-12-12 | Холбоос | |

Бүртгэлтэй нэрээр бичих
 
  хариу
Зочин нэрээр бичих

:-)
оруулах
 
idiomatic-dormant